Leviticus 4

Umnikelo wesono

1UJehova wathi kuMosi, 2“Tshela abantu bako-Israyeli ukuthi: ‘Nxa umuntu esona kodwa engoni ngabomo njalo esenza konke okwalelwa yimilayo kaJehova –

3“ ‘Nxa umphristi ogcotshiweyo angona abeseletha icala ebantwini kumele alethe kuJehova inkunzi encinyane engelasici njengomnikelo wesono ngenxa yesono ayabe esenzile. 4Kalethe inkunzi esangweni leThente lokuHlanganela, phambi kuka Jehova. Uzabeka isandla sakhe ekhanda layo abeseyihlaba phambi kukaJehova. 5Umpristi ogcotshiweyo uzathatha elinye igazi lenkunzi alise eThenteni lokuHlanganela. 6Kacwilise umunwe wakhe egazini abesechela elinye lakhona kasikhombisa phambi kuka Jehova, phambi kwekhetheni lendlu engcwele. 7Umpristi uzafaka elinye igazi empondweni ze-alithare lempepha elephunga elimnandi eliphambi kuka Jehova eThenteni lokuHlanganela. Igazi lenkunzi eliseleyo uzalithela phansi kwealithare lomnikelo wokutshiswa esangweni leThente lokuHlanganela. 8Uzasusa wonke amahwahwa enkunzi yomnikelo wesono – idanga lonke lawo wonke amahwahwa embese ezangaphakathi. 9Izinso zombili lamahwahwa azo okuseduzane lesinqe lokwembese isibindi kuzakhutshwa ndawonye lezinso –

10njengalokho okwenziwa nxa ihwahwa lisuswa enkabini eyabe ingumnikelo wobudlelwano. Umphristi uzakutshisela e-alithareni lomnikelo wokutshiswa. 11Kodwa isikhumba senkunzi kanye lenyama yayo yonke kuthatha inhloko lamangqina, ezangaphakathi lamathumbu –

12okutsho ingxenye yonke yenkunzi – kumele akukhuphele phandle kwezihonqo endaweni ehlambulukileyo ngokomkhuba lapho okuchithelwa khona umlotha, abesekutshisela emlilweni wenkuni oyabe usenqumbini yomlotha.

13“ ‘Nxa uzulu wonke wakwele – Israyeli angona, engoni ngabomo abesesenza konke okwalelwa yimilayo kaJehova, lanxa uzulu lowo engazi lutho ngodaba lolu, ulecala. 14Nxa bangavele bazi ngesono abasenzileyo ibandla kumele lilethe inkunzi encinyane njengomnikelo wesono liyethule phambi kweThente lokuHlanganela. 15Abadala bakuleyondawo bazabeka izandla zabo ekhanda lenkunzi phambi kuka Jehova, njalo inkunzi izahlatshelwa phambi kuka Jehova.

16Umphristi ogcotshiweyo uzathatha elinye igazi lenkunzi angene lalo eThenteni lokuHlanganela. 17Uzacwilisa umunwe wakhe egazini abeselichela phambi kuka Jehova kasikhombisa phambi kwekhetheni. 18Kaninde elinye igazi empondweni ze-alithare eliphambi kuka Jehova eThenteni lokuHlanganela. Igazi eliseleyo uzalithela phansi kwe-alithare lomnikelo wokutshiswa esangweni leThente lokuHlanganela. 19Kakhuphe wonke amahwahwa abesewatshisela e-alithareni

20abesesenza enkunzini le lokho akwenza enkunzini yomnikelo wesono. Ngalokho umphristi uzabenzela indlela yokubuyisana phakathi kwabo njalo bazaxolelwa.

21Kakhuphele inkunzi phandle kwezihonqo abeseyitshisa njengalokho akwenza inkunzi yakuqala. Lo ngumnikelo wesono okazulu wonke.

22“ ‘Nxa umkhokheli angona enganxwanelanga enze okwaliwa yimilayo kaJehova uNkulunkulu, ulecala. 23Nxa angatshelwa ngesono asenzileyo kumele alethe umnikelo wembuzi enduna engelasici. 24Kabeke isandla sakhe ekhanda lembuzi abeseyihlabela lapho okuhlatshelwa khona umnikelo wokutshiswa phambi kukaJehova. Kungumnikelo wesono. 25Umphristi uzathatha elinye igazi lomnikelo wesono abeselininda empondweni ze-alithare lomnikelo wokutshiswa abesethela elinye lonke igazi phansi kwe-alithare.

26Uzatshisela wonke amahwahwa e-alithareni njengalokhu akwenza amahwahwa omnikelo wobudlwelwano. Ngale indlela umphristi uzakwenza indlela yokubuyisana ngesono somuntu abe sethethelelwa.

27“ ‘Nxa omunye umuntu phakathi kwendawo angona enganxwanelanga enze okwaliwa yimilayo kaJehova, uyabe elecala.

28Nxa angatshelwa ngesono ayabe esenzile kumele alethe umnikelo wesono sakhe owembuzi ensikazi engelasici. 29Kabeke isandla sakhe ekhanda lomnikelo wesono abesewuhlabela endaweni yomnikelo wokutshiswa. 30Umphristi kumele athathe elinye igazi ngomunwe wakhe abeselininda empondweni ze-alithare lomnikelo wokutshiswa abesethela elinye eliseleyo phansi kwe-alithare. 31Uzakhupha amahwahwa wonke njengalokhu okwenziwa emnikelweni wobudlelwano njalo umphristi uzawutshisela ealithareni njengoqhatshi olukhangayo kuJehova. Ngaleyondlela umphristi uzamenzela indlela yokubuyisana, abesethethelelwa.

32“ ‘Nxa angaletha imvu njengomnikelo wesono kumele alethe ensikazi engelasici.

33Kumele abeke isandla sakhe enhlokweni layo abeseyihlaba njengomnikelo wesono endaweni lapho okuhlatshelwa khona umnikelo wokutshiswa. 34Muva kwalokho umphristi uzathatha ngomunwe elinye igazi lomnikelo wesono alininde empondweni ze-alithare lomnikelo wokutshiswa abesethela elinye igazi eliseleyo ngaphansi kwe-alithare. 35Uzakhupha wonke amahwahwa, njengalokhu okwenziwa emvini yomnikelo wobudlelwano, njalo umphristi uzayitshisela e-alithareni phezu kweminikelo eyenzelwa uJehova ngomlilo. Ngalokho umphristi uzamenzela indlela yokubuyisana ngesono asenzileyo abesethethelelwa.